daisy127的部落格

還記得一個月前決定去日本時, 家人同朋友中十個有十個都會講: 乜你地兩個咁勇呀?, 唔驚幅射咩?

其實一直都唔認為自己好勇, 依家咁0既時勢, 去台灣又話有塑化劑, 去歐洲又話有變種惡菌, 去東南亞又話政局不穩.., 莫非香港就一定安全咩?

' 該死唔使病啦', 所以我同老公一致決定去做自己想做0既事. 況且機票又免費, 酒店又有特價. 最重要係冇乜遊客去日本旅遊, 唔使同人爭.

由決定去日本到出發只有一個月編排行程, 時間十分緊迫. 每日放工後都花數個小時去發掘東京以外未去過0既地方, 格價睇下咩酒店最平最方便, 不斷search人地d blog睇下來回金沢, 白川鄉同立山黑部0既交通同觀光資料, 又要查下買JR Pass好還是搭巴士好? 邊架夜行巴士最平, 設備又比較好?..最後兩個星期, 幾乎每日得3-4 小時睡覺時間. 到最後一星期知道將會有個超強颱風會吹襲日本, 每日都要花時間留意颱風動向, 亦要為最壞情況作準備, 真係人都癲.

旅行前搵料做準備都算係一種樂趣. 越搵得多資料, 就越想快d去.

今次去東京, 只需5分鐘已經過到關可以拎行李. 以前從未試過, 去左幾間藥房一個香港人都見唔到, sales仲多過客.

雖然冇乜遊客, 但好食0既餐廳依舊要排隊, 池袋60通同新宿依舊有好多人好熱鬧. 唯一唔同係要節電, 所以某部份商店及JR/ Metro車箱內的冷氣同燈都會熄掉, 新宿街頭不再五光十色..一切都唔緊要, 因為我地去日本唔係為左嘆冷氣同睇燈飾架.

離開日本的時候, 成田機場見到佢地, 更令我覺得今次日本之旅係正確0既.

日本, 加油呀 ~

  全篇完