daisy127的部落格

尋晚11點幾就訓咗, 所以今日好精神, 9 點就預備好食早餐.

我地4個食酒店對面嘅富源, 另外5位就食酒店早餐.

乜都有得賣,有炒粉麵飯, 多士, 炸魚, 腸仔...

最後我地試咗KAYA 多士同炒粉麵

仲有唔少得嘅拉茶.

不過呢餐味道普通.

剛好遇週日市集, 行咗一圈, 冇乜特別.

 之後就到酒店拎埋d行裝, 同用MYR 4 租咗兩條沙灘用大毛巾, 就去碼頭join埋其他朋友.

入面有幾個counter, 可以提供出島嘅船同設備.

附近有出海用品賣.

 亦有小食飲品.

最後我地去咗counter 3 問下到sapi 嘅價.

佢地識講廣東話, 初頭佢開價每人MYR 23 , 不過我地還價, 最後MYR 18成交.

另外要加MYR 10 救生衣同 MYR 7.2 碼頭稅.

如要浮潛工具要另外租, 不過衛生問題, 我自備咗.

攪掂晒所有嘢都十一點, 要立即出發喇, 因為book 咗4點船返.

今日嘅天氣都唔錯.

 我地就係坐呢架船出島喇.

大約15分鐘就到SAPI.

入島前會有個亭收入島費, 一落船就會有個人check 下你嘅單據, 帶你去俾入島費, 再簡單介紹島上嘅設備.

你亦要認住佢, 走果陣要搵返佢.

 望出去嘅景色好靚.

若果你會join 島上 嘅BBQ  (每人MYR 40), 就可以免費用佢地d 枱同椅.

我地冇join, 所以喺島上搵咗兩張長枱連椅, 好似香港d 公眾BBQ場咁嘅.

不過有d 樹蔭, 有d冇, 所以手快有, 手慢冇喇.

島上有大蜥蜴, 不過唔會襲擊人.

搵到枱放好d 嘢之後, 就出海浮潛先.

島上左右海灘都可以浮潛, 不過剛好右面灘退潮, 冇乜魚仔, 所以我地去咗左面灘.

毛仔呀.

浮浮下突然感到雙腳好痛, 一上岸 即刻見到好多紅點, 好痛好痛.

第一時間懷疑俾水母電, 所以即刻搵島上救護站, 佢地俾D 醋我沖洗, 仲叫我唔好捽佢.

攪到咁, 唯有休息下先.

到一點食飯時間, 因為島上真係冇咩好食, 所以都係join咗BBQ buffet.

 食完lunch, 隻腳都未好返, 所以周圍影下相.

等右面海灘水漲返就落水玩多一陣, 不過我唔會再過去左面海灘喇, 有水母嘅.

到咗4點, 我地搵返個staff, 佢就會按排我地坐邊架船.

 夕陽下嘅合照.

回程d風好舒服, 不過都因為太大風, 我地有一個水泡用咗一日就被吹走咗.

 返到碼頭, 大家都忍唔住買d 消暑食品.

到沙巴必食嘅雪條, MYR 2 一條,榴蓮同尖多都好好味.

沿途見到一個商埸有supermarket, 諗住入定d貸今晚飲先. 不過見到最平嘅 blue ice (MYR 3.5) 賣晒, 其他起碼 MYR 6.x -7.X 一罐, 所以冇買到.

返酒店沖完涼之後, 就出發食餐飽.

第一晚冇食海鮮, 今晚一定要試下雙天先.

去到Sedco square, 隔離珍珠樓嘅staff 鬼咁好口, 又話俾九折我地 (可能因為冷氣整緊, 冇得用), 見d海鮮一樣咁新鮮,  咁就試下啦.

 先來桔仔冰消下暑.

再來奶油虎蝦

虎蝦刺身

不得不介紹佢個椰子布甸, 真係好清香, 一定要食. 呢餐9個人每人MYR 89.

食完之後都係8點幾, 於是心思思想行去尋日冇去到嘅菲律賓市場.

大部份都係BBQ 類嘅食物.

雞全亦又抵又好食, MYR 1.5 一隻, 串燒一樣價錢.

 燒虎蝦 MYR 30一隻, MYR 80 三隻.

可以坐喺度食, 不過太大煙, 又熱, 所以決定買返酒店食.

沿途見到有芒果賣, MYR 15-25, 6個,  睇大細. 我地最尾買咗MYR 25 六個, 幾個人一齊分.

回程嘅時侯去咗當地一間平價超市 - 美麗華百貨, 見佢佢最平嘅啤酒都係賣MYR 7.2, 唔理喇, 買返一打, 今晚玩住先.

隻虎蝦有成呎長, d 肉質都OK.

食下宵夜, 飲下啤酒, 玩下鋤大Dee, 玩到兩點就各自休息喇.